Еуропа елдері

Еуропа – Ескі дүние бөлігі. Еуропа Еуразияның батысын алып жатыр. Жер көлемі аралдармен қоса есептегенде 10 млн шаршы шақырымды құрайды.

Еуропаның ең биік нүктесі – Альпі тауындағы биіктігі 4807 м болатын Монблан шыңы. Батыс Еуропада халқының саны жөнінен бірінші орындағы ел – Германия. Германия халқының саны 82,6 млн адам.

Германияда ең ірі көмір кен орны Рур алабы орналасқан. Рур алабына бағдарланып, қара металлургия дамыған.

Германия химия өнеркәсібінің дамуы жөнінен дүниежүзінде бірінші орын алады. Химия өнеркәсібінің өте жоғары деңгейде дамуына қарай Германияны "химиялық держава" деп атайды.

Жер шарындағы ең көне монархия – Ұлыбритания. Ұлыбританияны королева басқарады. Ұлыбританияның солтүстік батысы мен солтүстігін таулы аудандар алып жатыр.

Ұлыбританияның ең биік нүктесі Бен-Невис тауы, оның биіктігі 1343 м. Ұлыбритания бокс, футбол, регби, крикет ойындарының шыққан жері болып саналады. Ұлыбритания халқы спортты ерекше жақсы көреді. Мұнда 2012 жылы үшінші рет жазғы олимпиада ойындары өтті.

Табиғатты қорғау туралы ең алғашқы заң 1273 жылы Ұлыбританияда шықты. Сол кездегі мемлекетті басқарушы корольдердің бірі қоршаған ортаны ластамау үшін көмір жағуға тыйым салған.

Франция халықаралық ұйымдардың белсенді мүшесі. Парижде БҰҰ-ның білім, ғылым және мәдениет жөніндегі арнайы ұйымының штаб пәтері орналасқан. Франция Одағының құрамына бес шалғай департамент пен Тынық мұхитындағы алыс аумақтар кіреді. Оңтүстік Америкадағы Гвиана елі Франция Одағының құрамына бес шалғай деапртаменттің бірі ретінде кіреді.

Қазіргі кезде Франция мемлекеті халықаралық туризм орталығы болып саналады. Франция жылына 75 млн турист қабылдайды. Мамандардың есептеуі бойынша, әрбір французға бір туристен келеді. Франциядағы ең ұзын өзені – Луара өзені. Луара өзенінің ұзындығы – 1012 шақырым.

Италия оңтүстік Еуропада орналасқан. Мемлекет парламенттік республика болғандықтан, елді президент тағайындаған премьер-министр басқарады. Италияның ауылшаруашылығында өсімдік шаруашылығы басым дамыған. Италиядағы дәстүрлі шаруашылық саласы жүзім өсіру болып саналады. Италия жүзім жинаудан үнемі Франциямен бәсекелеседі.

Италия жылына 61 млн литр шарап өндіреді.

Оңтүстік Еуропадағы ең ірі ел – Испания. Испанияның жер көлемі 504 мың шаршы шақырым. Астанасы – Мадрид қаласы. Испанияның мемлекеттік құрылымы – парламенттік монархия.

Солтүстік Еуропа елдеріне Норвегия, Швеция, Финлядия, Исландия, Дания жатады. Солтүстік Еуропа елдері түбектер мен аралдарда орналасқан. Солтүстік Еуропа елдері Еуропа жерінің 17 пайызын иеленеді.

Нидерланд – орта Еуропадағы ерекше көзге түсетін ел. Себебі жерінің шағын болуына қарамастан, Еуропадағы саяси жағдайларды шешуде өзіндік орны бар, НАТО-ның және басқа да халықаралық ұйымдардың белсенді мүшесі болып саналады.

Жүк айналымы жөнінен бірінші орын алатын Роттердам порты Нидерландыда. Роттердам порты арқылы жылына 310 млн т жүк тасымалданады.

Люксембург жан басына шаққанда жылына 10 т болат өндіреді. Сондықтан Люксембургты "болат герцогтігі" деп атайды.

Еуропадағы бейтарап елдерге Аустрия мен Швейцария жатады. Бейтарап елдер басқа елдердің ішкі және сыртқы саясатына қатысты мәселелерге ешқашан араласпайды. Шығыс Еуропада теміржол көлігі жетекші көлік саналады. Теміржолдың жүк айналымындағы үлесі өте жоғары, теміржолмен негізінен металл мен темір кендері тасымалданады.

Шығыс Еуропадағы Кох-и-нор қарындашын Чехия елі шығарады. Чехия сонымен қатар көркемдік шыны мен әшекей заттар шығарудан көзге түседі.

Венгрия машина жасау өнеркәсібіне: Икарус автобусын шығару, электротехникалық, есептеуіш машина жасауға маманданған.

Германия                                               

Италия

Ұлыбритания

Париж